Reda Sosial ta traha pa kombatí pobresa riba Kòrsou pa medio di finansiamentu di proyekto ku, di un manera òf otro, ta trese alivio den situashon di bida di esnan ménos privilegiá, ku ta fomentá nan abilidat pa kuida nan mes i ku ta enfoká riba desaroyo sosial i ekonómiko.
Metanan
Na momentu ku a lanta Reda Sosial e programa di akshon tabata konsistí di dos komponente (maneho di dos liña), esta:
- desaroyo sosial i
- desaroyo ekonómiko.
E promé liña, e asina yamá programa di urgensia, mester tabata dirigí klaramente riba realisá den korto tempu un maniobra di rekuperashon, ku meta pa eliminá mas tantu posibel e retrasonan ku a surgi riba hopi tereno den kurso di añanan. E maniobra di rekuperashon akí tabata dirigí prinsipalmente riba realisá riba término kòrtiku spesialmente proyektonan di infrastruktura, manera drecha kaya, bibienda, edifisio di skol, sentro di bario i fasilidatnan deportivo; renobá material i medionan pa enseñansa básiko. Ademas ehekushon dje proyektonan akí lo a duna un impulso pa empleo temporal. Mester a pone hopi énfasis riba akshonnan konkreto i visibel riba término kòrtiku, dirigí riba drechamentu struktural di kalidat di bida den bario.
Den kombinashon ku programanan di sosten pa edukashon i di rekapasitashon e programa di urgensia lo a pone base pa e di dos liña, esta e programa struktural. Den e programa struktural a pone énfasis riba stimulá kresementu ekonómiko i krea empleo, pa subi resistensia ekonómiko i oumentá di e forma ei abilidat di poblashon pa sali pa su mes.
Despues dje inbestigashon di pobresa di 1998 ku a publiká na 1999 (Pobresa ban atak’é), Reda Sosial a kambia su aktividatnan, dirigiendo nan mas spesífikamente riba kombatimentu di pobresa, den kua un aserkamentu integral di bario tin un posishon sentral. For di e tempu ei énfasis ta riba e kuater prinsipionan básiko di aserkamentu integral di bario, esta:
- bario kaminda pa por biba
- bario ku ta traha
- bario ku ta siña i
- bario salú.