Na 1996 e Komishon Tripartit pa Problemátika di Debe di Antia Hulandes i Aruba a publiká e rapòrt Debe òf futuro (Schuld of toekomst) òf rapòrt Van Lennep, yamá na presidente di e Komishon. A konstatá ku e situashon sosial i sosio-ekonómiko alarmante di Antia Hulandes durante promé parti di dékada nobenta tabata sklama pa akshon. E rapòrt Van Lennep tabata motibu pa un akuerdo di finansiamentu entre Hulanda i Antia Hulandes pa yega na un programa sosial di urgensia.
Pa e motibu akí gobièrnu di Antia Hulandes a instalá e Komishon Akshon Sosial na yanüari 1996. A registrá konklushon- i rekomendashonnan di e Komishon den e rapòrt Man na Obra (Aan de Slag).
E programa di akshon sosio-ekonómiko proponé tabata konsistí di dos komponente:
- un programa di urgensia i
- un programa struktural.
E programa di urgensia tabata relashoná ku medidanan ku mester a baha riba término kòrtiku, retrasonan sosial, spesífikamente den barionan ku problema, pero tabata dirigí tambe riba renobashon di material i medionan pa enseñansa. Esaki miéntras e programa struktural mester a kondusí na diversifikashon i kresementu di ekonomia.
A lanta e fundashon Fonds voor Sociale Ontwikkeling en Economische Bedrijvigheid, mihó konosí komo Reda Sosial, 31 di mei 1996 komo un instrumento pa ehekutá e aktividatnan menshoná den e rapòrt Aan de Slag. Esnan inbolbí den lantamentu di e fundashon tabata: R. Aartsma, L. Capriles, E. Cova, L. Emmerij, E. van der Hoeven i E. Tromp.
Pa fiha atenshon riba e problemátika di pobresa (tantu material komo mental) ku intenshon pa bèrdaderamente traha riba e asuntu akí Reda Sosial a hasi un inbestigashon di pobresa na Kòrsou na 1998, loke na 1999 a kondusí na e publikashon Pobresa, ban atak’é. E publikashon akí ta enfatisá importansia di partisipashon dje grupo di enfoke mes pa programanan pa kombatí pobresa, ehekutá na nivel di bario, por ta efektivo.
For di e tempu ei Reda Sosial a dirigí énfasis mas i mas riba kombatimentu di pobresa na Antia Hulandes, den kua un aserkamentu integral di bario ta sentral.