For di despues di publikashon di Pobresa, ban atak’é (1999) Reda Sosial a dediká su mes na ehekutá diesdos programa pa kombatí pobresa den seis di e diesdos barionan ku retraso na Kòrsou, esta: Soto, Kanga/Dein, Berg Altena i bisindario, Seru Grandi/Fuik, Roi Santu, Otrobanda. Ta trata di programanan dirigí riba drecha kas, alfabetisashon, traha presupuesto, aktividatnan edukativo etc.
Na 2001 a selektá den konsulta ku Kolegio di Gobernashon di Kòrsou e bario St. Jago komo bario piloto pa e programa di aserkamentu integral di bario.
Un esena kambiá di kaya den St. Jago, Kòrsou
1999 2004
Den Atakando Pobresa (2003) Reda Sosial ta boga un biaha mas enfátikamente pa e importansia ku mester duna na un aserkamentu integral di bario.
Pa Reda Sosial kombatimentu di pobresa no ta solamente un asuntu di trabou infrastruktural. Pareu ku e trayekto infrastruktural mester pone un trayekto sosial kuminsá kana, ku atenshon pa desaroyo di HENDE. Sentral aki ta e kuater puntonan di salida apliká den aserkamentu integral di bario, esta un bario kaminda por biba, traha, ku ta salú i ku ta siña.
E konsepto ‘bario kaminda por biba’ ta enserá hopi aspekto. E ta referí tantu na kalidat di ambiente di bida komo na kalidat di bida di individuonan. Entre nan dos tin klaramente un interakshon. Ora bisindario tin influensia negativo riba kondishon mental i físiko di habitantenan, esei tin na su turno konsekuensia pa produktividat laboral, prestashon di mucha na skol, seguridat den bario i komportashon sosial.
P’esei invershon den ambiente físiko ta forma un kontribushon importante pa drecha situashon sosio-ekonómiko di un bario.
Sin embargo, invershon den kalidat di bida i empleo den bario no ta sufisiente garantia pa drecha situashon general den barionan ku retraso. P’esei ta importante pa paga atenshon tambe na edukashon i salú den bario, por ehèmpel den forma di programa pa hende di edat (terapia di moveshon), informashon pa gruponan di rísiko manera mamanan tineidjer, kon traha presupuesto, sosten pa edukashon, sikoterapia pa mucha for di ambiente sosial débil i kuido despues di skol den bario ku retraso.
Kombatimentu di pobresa ta rekerí un proseso kontinuo den kua mester tin garantia ku por disponé di sufisiente medio. Pa motibu di fondonan limitá Reda Sosial por a gasta solamente un FL. 4 miyon na kombatimentu di pobresa durante e periodo 2001 te medio 2004.
Den kuadro di e Programa di Urgensia Kombatimentu di Pobresa na Antia Hulandes (yüli 2004- yanüari 2006) tantu gobièrnu di Antia Hulandes komo esun di Hulanda a pone un montante di ANG 5 miyon disponibel pa Reda Sosial ehekutá e programa “Aserkamentu Integral di Bario”.